ИНГЭНИЙ СҮҮНИЙ ҮЛДЭГДЛИЙГ ХЯНАХ ТӨЛӨВЛӨГӨӨ БОЛОВСРУУЛАХ АЖЛЫН ХЭСЭГ БАЙГУУЛАГДЛАА

🐪 Ингэний сүүний чанар, хүнсний аюулгүй байдлыг хангах, мал эмнэлгийн эмийн болон бусад бохирдуулагчийн үлдэгдэлд тогтмол хяналт тавих зорилгоор ажлын хэсэг албан ёсоор байгуулагдаж, анхны уулзалтаа амжилттай зохион байгууллаа.

Ажлын хэсгийн анхны уулзалтаар “Ингэний сүүний үлдэгдлийг хянах төлөвлөгөө” боловсруулах ажлын зорилго, хэрэгжүүлэх үе шат, оролцогч талуудын чиг үүргийг хэлэлцэн, цаашид хэрэгжүүлэх ажлын төлөвлөгөөг боловсруулж баталгаажууллаа.

Тус ажлын хүрээнд:

🔹 Ингэний сүү болон сүүн бүтээгдэхүүнд хяналт тавих үлдэгдлийн үзүүлэлтүүдийг тодорхойлох

🔹 Мал эмнэлгийн эм, антибиотик болон бусад бодисын хэрэглээ, хүлээлгийн хугацаанд хяналт тавих тогтолцоог боловсронгуй болгох

🔹 Түүхий сүү бэлтгэн нийлүүлэлтээс эхлээд боловсруулах үйлдвэр хүртэлх үе шатанд дээж авах, шинжлэх, бүртгэх тогтолцоо бий болгох

🔹 Лабораторийн шинжилгээ, мониторингийн давтамж, аргачлал, хариу арга хэмжээг тодорхойлох

🔹 Үлдэгдлийн хяналтыг Монгол Улсын холбогдох стандарт, дүрэм журам болон Codex Alimentarius-ийн олон улсын шаардлагатай уялдуулах

🔹 Цаашид ингэний сүүн бүтээгдэхүүнийг экспортын зах зээлд гаргахад шаардлагатай хүнсний аюулгүй байдал, чанарын баталгааг бүрдүүлэх

чиглэлээр ажиллахаар төлөвлөж байна.

Ингэний сүүний салбарын олон улсын хөгжлийн хүрээнд тэмээний төрлийн амьтдын мах, сүүнд малын эмийн үлдэгдлийн зөвшөөрөгдөх дээд хэмжээг тогтоох асуудал Codex-ийн түвшинд мөн идэвхтэй яригдаж байна.

Монгол Улсад ч малын гаралтай бүтээгдэхүүн дэх эмийн үлдэгдлийг илрүүлэх, хянах судалгаа, шинжилгээний ажил хийгдэж байгаа бөгөөд сүүний үлдэгдлийн хяналтыг тогтмол үргэлжлүүлэх шаардлагатайг судалгаанууд харуулж байна.

Тиймээс энэхүү ажлын хэсэг нь Монголын ингэний сүүний салбарт эрсдэлд суурилсан үлдэгдлийн хяналтын тогтолцоог бий болгож, хүнсний аюулгүй байдлыг баталгаажуулахын зэрэгцээ олон улсын зах зээлд өрсөлдөх чадварыг нэмэгдүүлэх чухал алхам болж байна.

🌏 Чанартай сүү – Аюулгүй бүтээгдэхүүн – Итгэлтэй экспорт

Монголын ингэний сүүний кластер ТББ
Монголын ингэний сүүг олон улсын чанар, аюулгүй байдлын шаардлагад нийцүүлэн хөгжүүлж, дэлхийн зах зээлд хүргэхийн төлөө.